॥ ಶ್ರೀ ಗುರುಭ್ಯೋ ನಮಃ ॥ ಹರಿಃ ಓಂ ॥ ಶ್ರೀಮನ್ಮಹಾಗಣಾಧಿಪತಯೇ ನಮಃ ॥

ಗಣನಾ᳚ಥ ಸರಸ್ವತೀ ರವಿಃ ಶುಕ್ರೋ ಬೃಹಸ್ಪತಿಃ।
ಪಞ್ಚೈತಾನಿ ಸ್ಮರೇನ್ನಿತ್ಯಂ ವೇದವಾ᳚ಣೀ ಪ್ರವರ್ತತೇ ॥
ಗುರವೇ ಸರ್ವಲೋಕಾನಾಂ ಭಿಷಜೇ ಭವರೋಗಿಣಾಂ ।
ನಿಧಯೇ ಸರ್ವವಿಧ್ಯಾನಾಂ ದಕ್ಷಿಣಾಮೂರ್ತಯೇ ನಮಃ ॥
ಓಂ ಅಥರ್ವಣಾಭಿಧೋ ವೇದೋ ಧವಲೋ ಮರ್ಕಟಾನನಃ ।
ಅಕ್ಷಮಾಲಾನ್ವಿತೋ ವಾಮೇ ದಕಕ್ಷೇ ಕುಮ್ಭಧರಃ ಸ್ಮೃತಃ ॥

ಓಂ ಅಥರ್ವವೇದ ಶೌನಕೀಯ ಶಾಖಾನ್ತರ್ಗತ ಮಹಾಮನ್ತ್ರಾಣಾಮ್,
ಅಥರ್ವಾದಯೋ ಋಷಯಃ, ಗಾಯತ್ರ್ಯಾದೀನಿ ಛನ್ದಾಂಸಿ,
ಚನ್ದ್ರಮಾ ಆಪ ವಿದ್ಯುದಾದಯೋ ದೇವತಾಃ,
ಶ್ರೀ ಪರಮೇಶ್ವರ ಪ್ರೀತ್ಯರರ್ಥೇ ಪಾರಾಯಣೇ ವಿನಿಯೋಗಃ ॥ ಹರಿಃ ಓಂ ॥

ಶಂ ನೋ᳚ ದೇ॒ವೀರ॒ಭಿಷ್ಟ॑ಯ॒ ಆಪೋ᳚ ಭವನ್ತು ಪೀ॒ತಯೇ᳚ ।
ಶಂ ಯೋರ॒ಭಿ ಸ್ರ॑ವನ್ತು ನಃ ॥

ಓಂ ಶಾನ್ತಿಃ ಶಾನ್ತಿಃ ಶಾನ್ತಿಃ ॥ ಹರಿಃ ಓಂ ॥

ಕಾಣ್ಡ-೧

೧।೧। ಮೇಧಾಜನನಮ್।

೧-೪ ಅಥರ್ವಾ। ವಾಚಸ್ಪತಿಃ। ಅನುಷ್ಟುಪ್, ೪ ಚತುಷ್ಪದಾ ವಿರಾಡುರೋಬೃಹತೀ।

ಯೇ॑ ತ್ರಿಷಪ್ತಾಃ ಪ॑ರಿ॒ಯ॑ನ್ತಿ ವಿಶ್ವಾ᳚ ರೂ॒ಪಾಣಿ॒ ಬಿಭ್ರ॑ತಃ ।
ವಾ॒ಚಸ್ಪ॒ತಿರ್ಬಲಾ॒ ತೇಷಾಂ᳚ ತನ್ವೋ᳚ ಅ॒ದ್ಯ ದ॑ಧಾತು ಮೇ ॥೧॥
ಪು॑ನರೇ॑ಹಿ ವಚಸ್ಪತೇ ದೇ॒ವೇನ॒ ಮ॑ನಸಾ ಸ॒ಹ।
ವಸೋ᳚ಷ್ಪತೇ॒ ನಿ ರ॑ಮಯ॒ ಮಯ್ಯೇ॒ವಾಸ್ತು॒ ಮಯಿ॑ ಶ್ರು॒ತಮ್॥೨॥
ಇ॒ಹೈವಾಭಿ॑ ವಿ ತ॑ನೂ॒ಭೇ ಆರ್ತ್ನೀ᳚  ಇವ॒ ಜ್ಯ॑ಯಾ᳚ ।
ವಾ॒ಚಸ್ಪತಿ॒ರ್ನಿ ಯ॑ಚ್ಛತು॒ ಮಯ್ಯೇ॒ವಾ॑ಸ್ತು॒ ಮಯಿ॑ ಶ್ರು॒ತಮ್॥೩॥
ಉ॑ಪಹೂತೋ ವಾ॒ಚಸ್ಪತಿ॒ರುಪಾ॒ಸ್ಮಾನ್ ವಾ॒ಚಸ್ಪ॑ತಿರ್ಹ್ವಯತಾಮ್।
ಸಂ ಶ್ರು॒ತೇನ॑ ಗಮೇಮಹಿ॒ ಮಾ ಶ್ರು॒ತೇನ॒ ವಿ ರಾ᳚ಧಿಷಿ ॥೪॥

೧।೨ ರೋಗೋಪಶಮನಮ್।

ಅಥರ್ವಾ। ಪರ್ಜನ್ಯಃ(೧,೪ ಪೃಥಿವೀ, ೩ ಇನ್ದ್ರಃ,(ಚನ್ದ್ರಮಾಶ್ಚ))। ಅನುಷ್ಟುಪ್, ೩ ತ್ರಿಪದಾ ವಿರಾಣ್ನಾಮ ಗಾಯತ್ರೀ।

ವಿ॒ದ್ಮಾ ಶ॒ರಸ್ಯ॑ ಪಿ॒ತರಂ᳚ ಪ॒ರ್ಜನ್ಯಂ॒ ಭೂ॑ರಿಧಾಯಸಮ್।
ವಿ॒ದ್ಮೋ ಷ್ವ॑ಸ್ಯ ಮಾ॒ತರಂ᳚ ಪೃಥಿ॒ವೀಂ ಭೂರಿ॑ವರ್ಪಸಮ್॥೧॥
ಜ್ಯಾಽಕೇ॒ ಪರಿ॑ ಣೋ ನ॒ಮಾಶ್ಮಾ᳚ನಂ ತ॒ನ್ವಂ᳚ ಕೃಧಿ ।
ವೀ॒ಡುರ್ವರೀ॒ಯೋಽರಾ᳚ತೀ॒ರಪ॒ ದ್ವೇಷಾಂ॒ಸ್ಯಾಽಕೃ॑ಧಿ ॥೨॥
ವೃ॒ಕ್ಷಂ ಯದ್ಗಾವಃ॑ ಪರಿಷಸ್ವಜಾ॒ನಾ ಅ॑ನುಸ್ಫು॒ರಂ ಶ॒ರಮರ್ಚ᳚ನ್ತ್ಯೃ॒ಭುಮ್।
ಶರು॑ಮ॒ಸ್ಮದ್ಯಾ᳚ವಯ ದಿ॒ದ್ಯುಮಿ᳚ನ್ದ್ರ ॥೩॥
ಯಥಾ॒ ದ್ಯಾಂ ಚ॑ ಪೃಥಿ॒ವೀಂ ಚಾ॒ನ್ತಸ್ತಿಷ್ಠ॑ತಿ॒ ತೇಜ॑ನಮ್।
ಏ॒ವಾ ರೋಗಂ᳚ ಚಾಸ್ರಾ॒ವಂ ಚಾ॒ನ್ತಸ್ತಿ॑ಷ್ಠತು॒ ಮುಞ್ಜ॒ ಇತ್॥೪॥

೧।೩ ಮೂತ್ರಮೋಚನಮ್।

೧-೯ ಅಥರ್ವಾ। ೧ ಪರ್ಜನ್ಯಃ, ೨ ಮಿತ್ರಃ, ೩ ವರುಣಃ, ೪ ಚನ್ದ್ರಃ, ೫ ಸೂರ್ಯಃ, (೧-೯ ಮೂತ್ರಮೋಚನಮ್)। ಅನುಷ್ಟುಪ್, ೧-೫ ಪಥ್ಯಾಪಙ್ಕ್ತಿಃ।

ವಿ॒ದ್ಮಾ ಶ॒ರಸ್ಯ॑ ಪಿ॒ತರಂ᳚ ಪ॒ರ್ಜನ್ಯಂ॑᳚ ಶ॒ತವೃ॑ಷ್ಣ್ಯಮ್ ।
ತೇನಾ॑ ತೇ ತ॒ನ್ವೇ॒೩ಶಂ ಕ॑ರಂ ಪೃಥಿ॒ವ್ಯಾಂ ತೇ᳚ ನಿ॒ಷೇಚ॑ನಂ ಬ॒ಹಿಷ್ಟೇ᳚ ಅಸ್ತು॒ ಬಾಲಿತಿ॑ ॥೧॥
ವಿ॒ದ್ಮಾ ಶ॒ರಸ್ಯ॑ ಪಿ॒ತರಂ᳚ ಮಿ॒ತ್ರಂ ಶ॒ತವೃ॑ಷ್ಣ್ಯಮ್ ।
ತೇ॑ನಾ ತೇ ತ॒ನ್ವೇ॒೩ ಶಂ ಕ॑ರಂ ಪೃಥಿ॒ವ್ಯಾಂ ತೇ᳚ ನಿ॒ಷೇಚ॑ನಂ ಬ॒ಹಿಷ್ಟೇ॑ ಅಸ್ತು॒ ಬಾಲಿತಿ॑ ॥೨॥
ವಿ॒ದ್ಮಾ ಶ॒ರಸ್ಯ॑ ಪಿ॒ತರಂ॒ ವರು॑ಣಂ ಶ॒ತವೃ॑ಷ್ಣ್ಯಮ್ ।
ತೇನಾ᳚ ತೇ ತ॒ನ್ವೇ॒೩ ಶಂ ಕ॑ರಂ ಪೃಥಿ॒ವ್ಯಾಂ ತೇ᳚ ನಿ॒ಷೇಚ॑ನಂ ಬ॒ಹಿಷ್ಟೇ᳚ ಅಸ್ತು॒ ಬಾಲಿತಿ॑ ॥೩॥
ವಿ॒ದ್ಮಾ ಶ॒ರಸ್ಯ॑ ಪಿ॒ತರಂ᳚ ಚ॒ನ್ದ್ರಂ ಶ॒ತವೃ॑ಷ್ಣ್ಯಮ್ ।
ತೇನಾ᳚ ತೇ ತ॒ನ್ವೇ॒೩ ಶಂ ಕ॑ರಂ ಪೃಥಿ॒ವ್ಯಾಂ ತೇ᳚ ನಿ॒ಷೇಚ॑ನಂ ಬ॒ಹಿಷ್ಟೇ᳚ ಅಸ್ತು॒ ಬಾಲಿತಿ॑ ॥೪॥
ವಿ॒ದ್ಮಾ ಶ॒ರಸ್ಯ॑ ಪಿ॒ತರಂ॒ ಸೂರ್ಯಂ᳚ ಶ॒ತವೃ॑ಷ್ಣ್ಯಮ್ ।
ತೇನಾ᳚ ತೇ ತ॒ನ್ವೇ॒೩ ಶಂ ಕ॑ರಂ ಪೃಥಿ॒ವ್ಯಾಂ ತೇ᳚ ನಿ॒ಷೇಚ॑ನಂ ಬ॒ಹಿಷ್ಟೇ᳚ ಅಸ್ತು॒ ಬಾಲಿತಿ॑ ॥೫॥
ಯದಾ॒ನ್ತ್ರೇಷು॑ ಗವೀ॒ನ್ಯೋರ್ಯದ್ವ॒ಸ್ತಾವಧಿ॒ ಸಂಶ್ರು॑ತಮ್ ।
ಏ॒ವಾ ತೇ॒ ಮೂತ್ರಂ᳚ ಮುಚ್ಯತಾಂ ಬ॒ಹಿರ್ಬಾಲಿತಿ॑ ಸರ್ವ॒ಕಮ್॥೬॥
ಪ್ರ ತೇ᳚ ಭಿನದ್ಮಿ॒ ಮೇಹ॑ನಂ॒ ವರ್ತ್ರಂ᳚ ವೇಶ॒ನ್ತ್ಯಾ ಇ॑ವ ।
ಏ॒ವಾ ತೇ॒ ಮೂತ್ರಂ᳚ ಮುಚ್ಯತಾಂ ಬ॒ಹಿರ್ಬಾಲಿತಿ॑ ಸರ್ವ॒ಕಮ್॥೭॥
ವಿಷಿ॑ತಂ ತೇ ವಸ್ತಿಬಿ॒ಲಂ ಸ॑ಮು॒ದ್ರಸ್ಯೋ᳚ದ॒ಧೇರಿ॑ವ ।
ಏ॒ವಾ ತೇ॒ ಮೂತ್ರಂ᳚ ಮುಚ್ಯತಾಂ ಬ॒ಹಿರ್ಬಾಲಿತಿ॑ ಸರ್ವ॒ಕಮ್॥೮॥
ಯಥೇ᳚ಷು॒ಕಾ ಪ॒ರಾಪ॑ತ॒ದವ॑ಸೃ॒ಷ್ಟಾಧಿ॒ ಧನ್ವ॑ನಃ ।
ಏ॒ವಾ ತೇ॒ ಮೂತ್ರಂ᳚ ಮುಚ್ಯತಾಂ ಬ॒ಹಿರ್ಬಾಲಿತಿ॑ ಸರ್ವ॒ಕಮ್॥೯॥

೧।೪ ಅಪಾಂ ಭೇಷಜಮ್।

೧-೪ ಸಿನ್ಧುದ್ವೀಪಃ।(ಅಪಾಂನಪಾತ್, ಸೋಮಃ,) ಆಪಃ। ಗಾಯತ್ರೀ, ೪ ಪುರಸ್ತಾದ್ ಬೃಹತೀ।

ಅ॒ಮ್ಬಯೋ᳚ ಯ॒ನ್ತ್ಯಧ್ವ॑ಭಿರ್ಜಾ॒ಮಯೋ᳚ ಅಧ್ವರೀಯ॒ತಾಮ್। ಪೃ॒ಞ್ಚ॒ತೀರ್ಮ॑ಧು॑ನಾ॒ ಪಯಃ॑ ॥೧॥
ಅ॒ಮೂರ್ಯಾ ಉಪ॒ ಸೂರ್ಯೇ॒ ಯಾಭಿ॑ರ್ವಾ॒ ಸೂರ್ಯಃ॑ ಸ॒ಹ। ತಾ ನೋ᳚ ಹಿನ್ವನ್ತ್ವಧ್ವ॒ರಮ್॥೨॥
ಅ॒ಪೋ ದೇ॒ವೀರುಪ॑ ಹ್ವಯೇ॒ ಯತ್ರ॒ ಗಾವಃ॒ ಪಿಬ᳚ನ್ತಿ ನಃ । ಸಿನ್ಧು॑ಭ್ಯಃ॒ ಕರ್ತ್ವಂ᳚  ಹ॒ವಿಃ ॥೩॥
ಅ॒ಪ್ಸ್ವ॑೧ನ್ತರ॒ಮೃತ॑ಮ॒ಪ್ಸು ಭೇ᳚ಷ॒ಜಮ್।
ಅ॒ಪಾಮು॒ತ ಪ್ರಶ॑ಸ್ತಿಭಿ॒ರಶ್ವಾ॒ ಭವ॑ಥ ವಾ॒ಜಿನೋ॒ ಗಾವೋ᳚ ಭವಥ ವಾ॒ಜಿನೀಃ᳚ ॥೪॥

೧।೫ ಅಪಾಂ ಭೇಷಜಮ್।

೧-೪ ಸಿನ್ಧುದ್ವೀಪಃ।(ಅಪಾಂನಪಾತ್, ಸೋಮಃ,) ಆಪಃ। ಗಾಯತ್ರೀ, ೪ ವರ್ಧಮಾನಾ।

ಆಪೋ॒ ಹಿ ಷ್ಠಾ ಮ॑ಯೋ॒ಭುವ॒ಸ್ತಾ ನ॑ ಊ॒ರ್ಜೇ ದ॑ಧಾತನ । ಮ॒ಹೇ ರಣಾ᳚ಯ॒ ಚಕ್ಷ॑ಸೇ ॥೧॥
ಯೋ ವಃ॑ ಶಿ॒ವತ॑ಮೋ॒ ರಸ॒ಸ್ತಸ್ಯ॑ ಭಾಜಯತೇ॒ಹ ನಃ॑ । ಉ॒ಶ॒ತೀರಿ॑ವ ಮಾ॒ತರಃ॑ ॥೨॥
ತಸ್ಮಾ॒ ಅರಂ᳚ ಗಮಾಮ ವೋ॒ ಯಸ್ಯ॒ ಕ್ಷಯಾ᳚ಯ॒ ಜಿನ್ವ॑ಥ । ಆಪೋ᳚ ಜ॒ನಯ॑ಥಾ ಚ ನಃ ॥೩॥
ಈಶಾ᳚ನಾ॒ ವಾರ್ಯಾ᳚ಣಾಂ॒ ಕ್ಷಯ᳚ನ್ತೀಶ್ಚರ್ಷಣೀ॒ನಾಮ್। ಅ॒ಪೋ ಯಾ᳚ಚಾಮಿ ಭೇಷ॒ಜಮ್॥೪॥

೧।೬ ಅಪಾಂ ಭೇಷಜಮ್।

೧-೪ ಸಿನ್ಧುದ್ವೀಪಃ।(ಅಥರ್ವಾ ಕೃತಿರ್ವಾ)। (ಅಪಾಂನಪಾತ್,) ಆಪಃ, ೨ ಆಪಃ ಸೋಮೋಽಗ್ನಿಶ್ಚ। ಗಾಯತ್ರೀ, ೪ ಪಥ್ಯಾಪಙ್ಕ್ತಿಃ।

ಶಂ ನೋ᳚ ದೇ॒ವೀರ॒ಭಿಷ್ಟ॑ಯ॒ ಆಪೋ᳚ ಭವನ್ತು ಪೀ॒ತಯೇ᳚ । ಶಂ ಯೋರ॒ಭಿ ಸ್ರ॑ವನ್ತು ನಃ ॥೧॥
ಅ॒ಪ್ಸು ಮೇ॒ ಸೋಮೋ᳚ ಅಬ್ರವೀದ॒ನ್ತರ್ವಿಶ್ವಾ᳚ನಿ ಭೇಷ॒ಜಾ।ಅ॒ಗ್ನಿಂ ಚ॑ ವಿ॒ಶ್ವಶಂ᳚ ಭುವಮ್॥೨॥
ಆಪಃ॑ ಪೃಣೀ॒ತ ಭೇ᳚ಷ॒ಜಂ ವರೂ᳚ಥಂ ತ॒ನ್ವೇ॒೩ ಮ॑ಮ । ಜ್ಯೋಕ್ ಚ॒ ಸೂರ್ಯಂ᳚  ದೃ॒ಶೇ॑॥೩॥
ಶಂ ನ॒ ಆಪೋ᳚ ಧನ್ವ॒ನ್ಯಾ॒೩ ಶಮು॑ ಸನ್ತ್ವನೂ॒ಪ್ಯಾಃ ।
ಶಂ ನಃ॑ ಖನಿ॒ತ್ರಿಮಾ॒ ಆಪಃ॒ ಶಮು॒ ಯಾಃ ಕು॒ಮ್ಭ ಆಭೃ॑ತಾಃ ಶಿ॒ವಾ ನಃ॑ ಸನ್ತು॒ ವಾರ್ಷಿ॑ಕೀಃ॥೪॥

೧।೭ ಯಾತುಧಾನನಾಶನಮ್।

೧-೭ ಚಾತನಃ। ಅಗ್ನಿಃ (ಜಾತವೇದಾಃ), ೩ ಅಗ್ನೀನ್ದ್ರೌ। ಅನುಷ್ಟುಪ್, ೫ ತ್ರಿಷ್ಟುಪ್।

ಸ್ತು॒ವಾ॒ನಮ॑ಗ್ನ॒ ಆ ವ॑ಹ ಯಾತು॒ಧಾನಂ᳚ ಕಿಮೀ॒ದಿನ᳚ಮ್।
ತ್ವಂ ಹಿ ದೇ᳚ವ ವನ್ದಿ॒ತೋ ಹ॒ನ್ತಾ ದಸ್ಯೋ᳚ರ್ಬ॒ಭೂವಿ॑ಥ ॥೧॥
ಆಜ್ಯ॑ಸ್ಯ ಪರಮೇಷ್ಠಿನ್ ಜಾತ॑ವೇದ॒ಸ್ತನೂ᳚ವಶಿನ್।
ಅಗ್ನೇ᳚ ತೌ॒ಲಸ್ಯ॒ ಪ್ರಾಶಾ᳚ನ ಯಾತು॒ಧಾನಾ॒ನ್ ವಿ ಲಾ᳚ಪಯ ॥೨॥
ವಿ ಲ॑ಪನ್ತು ಯಾತು॒ಧಾನಾ᳚ ಅ॒ತ್ತ್ರಿಣೋ॒ ಯೇ ಕಿ॑ಮೀ॒ದಿನಃ॑ ।
ಅಥೇ॒ದಮ॑ಗ್ನೇ ನೋ ಹ॒ವಿರಿನ್ದ್ರ॑ಶ್ಚ ಪ್ರತಿ॑ ಹರ್ಯತಮ್॥೩॥
ಅ॒ಗ್ನಿ ಪೂರ್ವ॒ ಆ ರ॑ಭತಾಂ॒ ಪ್ರೇನ್ದ್ರೋ᳚ ನುದತು ಬಾಹು॒ಮಾ॑ನ್।
ಬ್ರವೀ᳚ತು॒ ಸರ್ವೋ᳚ ಯಾತು॒ಮಾನ॒ಯಮ॒ಸ್ಮೀತ್ಯೇತ್ಯ॑ ॥೪॥
ಪಶ್ಯಾ᳚ಮ ತೇ ವೀ॒ರ್ಯಂ᳚ ಜಾತವೇದಃ॒ ಪ್ರ ಣೋ᳚ ಬ್ರೂಹಿ ಯಾತು॒ಧಾನಾ᳚ನ್ ನೃಚಕ್ಷಃ ।
ತ್ವಯಾ॒ ಸರ್ವೇ॒ ಪರಿ॑ತಪ್ತಾಃ ಪು॒ರಸ್ತಾತ್ತ ಆ ಯ᳚ನ್ತು ಪ್ರಬ್ರುವಾ॒ಣಾ ಉಪೇ॒ದಮ್॥೫॥
ಆ ರ॑ಭಸ್ವ ಜಾತವೇದೋ॒ಽಸ್ಮಾಕಾರ್ಥಾ᳚ಯ ಜಜ್ಞಿಷೇ ।
ದೂ॒ತೋ ನೋ᳚ ಅಗ್ನೇ ಭೂ॒ತ್ವಾ ಯಾ᳚ತು॒ಧಾನಾ॒ನ್ ವಿ ಲಾ᳚ಪಯ ॥೬॥
ತ್ವ॑ಮಗ್ನೇ ಯಾತು॒ಧಾನಾ॒ನುಪ॑ಬದ್ಧಾಁ ಇ॒ಹಾ ವ॑ಹ ।
ಅಥೈ᳚ಷಾ॒ಮಿನ್ದ್ರೋ॒ ವಜ್ರೇ॒ಣಾಪಿ॑ ಶೀ॒ರ್ಷಾಣಿ॑ ವೃಶ್ಚತು ॥೭॥

೧।೮ ಯಾತುಧಾನನಾಶನಮ್।

೧-೪ ಚಾತನಃ। ೧-೨ ಬೃಹಸ್ಪತಿಃ, ಅಗ್ನೀಷೋಮೌ ಚ, ೩-೪ ಅಗ್ನಿಃ (ಜಾತವೇದಾಃ)। ೧-೩ ಅನುಷ್ಟುಪ್, ೪ ಬಾರ್ಹತಗರ್ಭಾ ತ್ರಿಷ್ಟುಪ್।

ಇ॒ದಂ ಹ॒ವಿರ್ಯಾ᳚ತು॒ಧಾನಾ᳚ನ್ ನ॒ದೀ ಫೇನ॑ಮಿ॒ವಾ ವ॑ಹತ್।
ಯ ಇ॒ದಂ ಸ್ತ್ರೀ ಪುಮಾ॒ನಕ॑ರಿ॒ಹ ಸ ಸ್ತು॑ವತಾಂ॒ ಜನಃ॑ ॥೧॥
ಅ॒ಯಂ ಸ್ತು॑ವಾ॒ನ ಆಗ॑ಮದಿ॒ಮಂ ಸ್ಮ॒ ಪ್ರತಿ॑ ಹರ್ಯತ ।
ಬೃಹ॑ಸ್ಪತೇ॒ ವಶೇ᳚ ಲ॒ಬ್ಧ್ವಾಗ್ನೀ᳚ಷೋಮಾ॒ ವಿ ವಿ॑ಧ್ಯತಮ್॥೨॥
ಯಾ॒ತು॒ಧಾನ॑ಸ್ಯ ಸೋಮಪ ಜ॒ಹಿ ಪ್ರ॒ಜಾಂ ನಯ॑ಸ್ವ ಚ ।
ನಿ ಸ್ತು॑ವಾ॒ನಸ್ಯ॑ ಪಾತಯ॒ ಪರ॒ಮಕ್ಷ್ಯು॒ತಾವ॑ರಮ್॥೩॥
ಯತ್ರೈ᳚ಷಾಮಗ್ನೇ॒ ಜನಿ॑ಮಾನಿ॒ ವೇತ್ಥ॒ ಗುಹಾ᳚ ಸ॒ತಾಮ॒ತ್ತ್ರಿಣಾಂ᳚ ಜಾತವೇದಃ ।
ತಾಂಸ್ತ್ವಂ ಬ್ರಹ್ಮ॑ಣಾ ವಾವೃಧಾ॒ನೋ ಜ॒ಹ್ಯೇ∫ಷಾಂ ಶತ॒ತರ್ಹ॑ಮಗ್ನೇ ॥೪॥

೧।೯ ವಿಜಯಾಯ ಪ್ರಾರ್ಥನಾ।

೧-೪ ಅಥರ್ವಾ। ೧ ವಸವಃ, ಇನ್ದ್ರಃ, ಪೂಷಾ, ವರುಣಃ, ಮಿತ್ರಃ, ಅಗ್ನಿಃ, ಆದಿತ್ಯಾಃ, ವಿಶ್ವೇದೇವಾಃ, ೨ ದೇವಾಃ, ಸೂರ್ಯಃ, ಅಗ್ನಿಃ, ಹಿರಣ್ಯಂ, ೩-೪ ಅಗ್ನಿಃ (ಜಾತವೇದಾಃ)। ತ್ರಿಷ್ಟುಪ್।

ಅ॒ಸ್ಮಿನ್ ವಸು॒ ವಸ॑ವೋ ಧಾರಯ॒ನ್ತ್ವಿನ್ದ್ರಃ॑ ಪೂ॒ಷಾ ವರು॑ಣೋ ಮಿ॒ತ್ರೋ ಅ॒ಗ್ನಿಃ ।
ಇ॒ಮಮಾ᳚ದಿ॒ತ್ಯಾ ಉ॒ತ॒ ವಿಶ್ವೇ᳚ ಚ ದೇ॒ವಾ ಉತ್ತ॑ರಸ್ಮಿ॒ನ್ ಜ್ಯೋತಿ॑ಷಿ ಧಾರಯನ್ತು ॥೧॥
ಅ॒ಸ್ಯ ದೇ᳚ವಾಃ ಪ್ರ॒ದಿಶಿ॒ ಜ್ಯೋ॑ತಿರಸ್ತು॒ ಸೂರ್ಯೋ᳚ ಅ॒ಗ್ನಿರು॒ತ ವಾ॒ ಹಿರ᳚ಣ್ಯಮ್।
ಸ॒ಪತ್ನಾ᳚ ಅ॒ಸ್ಮದಧ॑ರೇ ಭವನ್ತೂತ್ತ॒ಮಂ ನಾಕ॒ಮಧಿ॑ ರೋಹಯೇ॒ಮಮ್॥೨॥
ಯೇನೇನ್ದ್ರಾ᳚ಯ ಸ॒ಮಭ॑ರಃ॒ ಪಯಾಂ᳚ಸ್ಯುತ್ತ॒ಮೇನ॒ ಬ್ರಹ್ಮ॑ಣಾ ಜಾತವೇದಃ ।
ತೇನ॒ ತ್ವಮ॑ಗ್ನ ಇ॒ಹ ವ᳚ರ್ಧಯೇ॒ಮಂ ಸ॑ಜಾ॒ತಾನಾಂ॒ ಶ್ರೈಷ್ಠ್ಯ॒ ಆ ಧೇ᳚ಹ್ಯೇನಮ್॥೩॥
ಐಷಾಂ᳚ ಯ॒ಜ್ಞಮು॒ತ ವರ್ಚೋ᳚ ದದೇ॒ಽಹಂ ರಾ॒ಯಸ್ಪೋಷ॑ಮು॒ತ ಚಿ॒ತ್ತಾನ್ಯ॑ಗ್ನೇ ।
ಸ॒ಪತ್ನಾ᳚ ಅ॒ಸ್ಮದಧ॑ರೇ ಭವನ್ತೂತ್ತ॒ಮಂ ನಾಕ॒ಮಧಿ॑ ರೋಹಯೇ॒ಮಮ್॥೪॥

೧।೧೦ ಪಾಪ -ವಿಮೋಚನಮ್।

೧-೪ ಅಥರ್ವಾ। ೧ ಅಸುರಃ, ೨-೪ ವರುಣಃ। ತ್ರಿಷ್ಟುಪ್, ೩ ಕಕುಮ್ಮತೀ ಅನುಷ್ಟುಪ್, ೪ ಅನುಷ್ಟುಪ್।

ಅ॒ಯಂ ದೇ॒ವಾನಾ॒ಮಸು॑ರೋ॒ ವಿ ರಾ᳚ಜತಿ॒ ವಶಾ॒ ಹಿ ಸ॒ತ್ಯಾ ವರು॑ಣಸ್ಯ॒ ರಾಜ್ಞಃ॑ ।
ತತ॒ಸ್ಪರಿ॒ ಬ್ರಹ್ಮ॑ಣಾ॒ ಶಾಶ॑ದಾನ ಉ॒ಗ್ರಸ್ಯ॑ ಮ॒ನ್ಯೋರುದಿ॒ಮಂ ನ॑ಯಾಮಿ ॥೧॥
ನಮ॑ಸ್ತೇ ರಾಜನ್ ವರುಣಾಸ್ತು ಮ॒ನ್ಯವೇ॒ ವಿಶ್ವಂ॒ ಹ್ಯು॒ಽಗ್ರ ನಿಚಿ॒ಕೇಷಿ॑ ದ್ರು॒ಗ್ಧಮ್ ।
ಸ॒ಹಸ್ರ॑ಮ॒ನ್ಯಾನ್ ಪ್ರ ಸು॑ವಾಮಿ ಸಾ॒ಕಂ ಶ॒ತಂ ಜೀ᳚ವಾತಿ ಶ॒ರದ॒ಸ್ತವಾ॒ಯಮ್॥೨॥
ಯದು॒ವಕ್ಥಾನೃ॑ತಂ ಜಿ॒ಹ್ವಯಾ᳚ ವೃಜಿ॒ನಂ ಬ॒ಹು।
ರಾಜ್ಞ॑ಸ್ತ್ವಾ ಸ॒ತ್ಯಧ᳚ರ್ಮಣೋ ಮು॒ಞ್ಚಾಮಿ॒ ವರು॑ಣಾದ॒ಹಮ್॥೩॥
ಮು॒ಞ್ಚಾಮಿ॑ ತ್ವಾ ವೈಶ್ವಾನ॒ರಾದ॑ರ್ಣ॒ವಾನ್ಮ॑ಹ॒ತಸ್ಪರಿ॑ ।
ಸ॒ಜಾ॒ತಾನು॑ಗ್ರೇ॒ಹಾ ವ॑ದ॒ ಬ್ರಹ್ಮ॒ ಚಾಪ॑ ಚಿಕೀಹಿ ನಃ ॥೪॥

೧।೧೧ ನಾರೀ–ಸುಖಪ್ರಸೂತಿಃ।

೧-೬ ಅಥರ್ವಾ। ಪೂಷಾ, ಅರ್ಯಮಾ, ವೇಧಾಃ, ದಿಶಃ, ದೇವಾಃ। ಪಙ್ಕ್ತಿಃ, ೨ ಅನುಷ್ಟುಪ್, ೩ ಚತುಷ್ಪದೋಷ್ಣಿಗ್ಗರ್ಭಾ ಕಕುಮ್ಮತ್ಯನುಷ್ಟುಪ್, ೪-೬ ಪಥ್ಯಾಪಙ್ಕ್ತಿಃ।

ವಷ॑ಟ್ ತೇ ಪೂಷನ್ನ॒ಸ್ಮಿನ್ತ್ಸೂ॑ತಾ᳚ವರ್ಯ॒ಮಾ ಹೋತಾ᳚ ಕೃಣೋತು ವೇ॒ಧಾಃ ।
ಸಿಸ್ರ॑ತಾಂ॒ ನಾರ್ಯೃ॒ತಪ್ರ॑ಜಾತಾ॒ ವಿ ಪರ್ವಾ᳚ಣಿ ಜಿಹತಾಂ॒ ಸೂತ॒ವಾ ಉ॑ ॥೧॥
ಚತ॑ಸ್ರೋ ದಿ॒ವಃ ಪ್ರ॒ದಿಶ॒ಶ್ಚತ॑ಸ್ರೋ॒ ಭೂಮ್ಯಾ᳚ ಉ॒ತ।
ದೇ॒ವಾ ಗರ್ಭಂ॒ ಸಮೈ᳚ರಯ॒ನ್ ತಂ ವ್ಯೂ᳚ರ್ಣುವನ್ತು॒ ಸೂತ॑ವೇ ॥೨॥
ಸೂ॒ಷಾ ವ್ಯೂ᳚ರ್ಣೋತು॒ ವಿ ಯೋನಿಂ᳚ ಹಾಪಯಾಮಸಿ ।
ಶ್ರ॒ಥಯಾ᳚ ಸೂಷಣೇ॒ ತ್ವಮವ॒ ತ್ವಂ ಬಿ॑ಷ್ಕಲೇ ಸೃಜ ॥೩॥
ನೇವ॑ ಮಾಂ॒ಸೇ ನ ಪೀವ॑ಸಿ॒ ನೇವ॑ ಮ॒ಜ್ಜಸ್ವಾಹ॑ತಮ್।
ಅವೈ᳚ತು॒ ಪೃಶ್ನಿ॒ ಶೇವ॑ಲಂ॒ ಶುನೇ᳚ ಜ॒ರಾಯ್ವತ್ತ॒ವೇಽವ॑ ಜ॒ರಾಯು॑ ಪದ್ಯತಾಮ್॥೪॥
ವಿ ತೇ᳚ ಭಿನದ್ಮಿ॒ ಮೇಹ॑ನಂ॒ ವಿ ಯೋನಿಂ॒ ವಿ ಗ॒ವೀನಿ॑ಕೇ ।
ವಿ ಮಾ॒ತರಂ᳚ ಚ ಪು॒ತ್ರಂ ಚ॒ ವಿ ಕು॑ಮಾ॒ರಂ ಜ॒ರಾಯು॒ಣಾವ॑ ಜ॒ರಾಯು॑ ಪದ್ಯತಾಮ್॥೫॥
ಯಥಾ॒ ವಾತೋ॒ ಯಥಾ॒ ಮನೋ॒ ಯಥಾ॒ ಪತ᳚ನ್ತಿ ಪ॒ಕ್ಷಿ॑ಣಃ॑ ।
ಏ॒ವಾ ತ್ವಂ ದ॑ಶಮಾಸ್ಯ ಸಾ॒ಕಂ ಜ॒ರಾಯು॑ಣಾ ಪ॒ತಾವ॑ ಜ॒ರಾಯು॑ ಪದ್ಯತಾಮ್॥೬॥

೧।೧೨ ಯಕ್ಷ್ಮನಾಶನಮ್।

೧-೪ ಭೃಗ್ವಙ್ಗಿರಾಃ। ಯಕ್ಷ್ಮನಾಶನಮ್। ಜಗತೀ(ತ್ರಿಷ್ಟುಪ್), ೪ ಅನುಷ್ಟುಪ್।

ಜ॒ರಾ॒ಯು॒ಜಃ ಪ್ರ॑ಥ॒ಮ ಉ॒ಸ್ರಿಯೋ॒ ವೃಷಾ॒ ವಾತ॑ಭ್ರಜಾ ಸ್ತ॒ನಯ᳚ನ್ನೇತಿ ವೃ॒ಷ್ಟ್ಯಾ।
ಸ ನೋ᳚ ಮೃಡಾತಿ ತ॒ನ್ವ ಋಜು॒ಗೋ ರು॒ಜನ್ ಯ ಏಕ॒ಮೋಜ॑ಸ್ತ್ರೇ॒ಧಾ ವಿ॑ಚಕ್ರ॒ಮೇ॥೧॥
ಅಙ್ಗೇ᳚ ಅಙ್ಗೇ ಶೋ॒ಚಿಷಾ᳚ ಶಿಶ್ರಿಯಾ॒ಣಂ ನ॑ಮ॒ಸ್ಯನ್ತ॑ಸ್ತ್ವಾ ಹ॒ವಿಷಾ᳚ ವಿಧೇಮ ।
ಅ॒ಙ್ಕಾನ್ತ್ಸ॑ಮ॒ಙ್ಕಾನ್ ಹ॒ವಿಷಾ᳚ ವಿಧೇಮ॒ ಯೋ ಅಗ್ರ॑ಭೀ॒ತ್ ಪರ್ವಾ᳚ಸ್ಯಾ॒ ಗ್ರಭೀ᳚ತಾ ॥೨॥
ಮು॒ಞ್ಚ ಶೀ᳚ರ್ಷ॒ಕ್ತ್ಯಾ ಉ॒ತ ಕಾ॒ಸ ಏ᳚ನಂ॒ ಪರು॑ಷ್ಪರುರಾವಿ॒ವೇಶಾ॒ ಯೋ ಅ॑ಸ್ಯ ।
ಯೋ ಅ॑ಭ್ರ॒ಜಾ ವಾ᳚ತ॒ಜಾ ಯಶ್ಚ॒ ಶುಷ್ಮೋ॒ ವನ॒ಸ್ಪತೀ᳚ನ್ತ್ಸಚತಾಂ॒ ಪರ್ವ॑ತಾಂಶ್ಚ ॥೩॥
ಶಂ ಮೇ॒ ಪರ॑ಸ್ಮೈ॒ ಗಾತ್ರಾ᳚ಯ॒ ಶಮ॒ಸ್ತ್ವವ॑ರಾಯ ಮೇ ।
ಶಂ ಮೇ᳚ ಚ॒ತುರ್ಭ್ಯೋ॒ ಅಙ್ಗೇ᳚ಭ್ಯಃ॒ ಶಮ॑ಸ್ತು ತ॒ನ್ವೇ॒೩ಮಮ॑ ॥೪॥

೧।೧೩ ವಿದ್ಯುತ್।

೧-೪ ಭೃಗ್ವಙ್ಗಿರಾಃ। ವಿದ್ಯುತ್। ಅನುಷ್ಟುಪ್, ೩ ಚತುಷ್ಪಾದ್ವಿರಾಡ್ ಜಗತೀ, ೪ ತ್ರಿಷ್ಟುಪ್ಪರಾ ಬೃಹತೀಗರ್ಭಾ ಪಙ್ಕ್ತಿಃ।

ನಮ॑ಸ್ತೇ ಅಸ್ತು ವಿ॒ದ್ಯುತೇ॒ ನಮ॑ಸ್ತೇ ಸ್ತನಯಿ॒ತ್ನವೇ᳚ ।
ನಮ॑ಸ್ತೇ ಅ॒ಸ್ತ್ವಶ್ಮ॑ನೇ॒ ಯೇನಾ᳚ ದೂ॒ಡಾಶೇ॒ ಅಸ್ಯ॑ಸಿ ॥೧॥
ನಮ॑ಸ್ತೇ ಪ್ರವತೋ ನಪಾ॒ದ್ಯತ॒ಸ್ತಪಃ॑ ಸ॒ಮೂಹ॑ಸಿ ।
ಮೃ॒ಡಯಾ᳚ ನಸ್ತ॒ನೂಭ್ಯೋ॒ ಮಯ॑ಸ್ತೋ॒ಕೇಭ್ಯ॑ಸ್ಕೃಧಿ ॥೨॥
ಪ್ರವ॑ತೋ ನಪಾ॒ನ್ನಮ॑ ಏ॒ವಾಸ್ತು॒ ತುಭ್ಯಂ॒ ನಮ॑ಸ್ತೇ ಹೇ॒ತಯೇ॒ ತಪು॑ಷೇ ಚ ಕೃಣ್ಮಃ ।
ವಿ॒ದ್ಮ ತೇ॒ ಧಾಮ॑ ಪರ॒ಮಂ ಗುಹಾ॒ ಯತ್ ಸ॑ಮು॒ದ್ರೇ ಅ॒ನ್ತರ್ನಿ॑ಹಿ॑ತಾಸಿ॒ ನಾಭಿಃ॑ ॥೩॥
ಯಾಂ ತ್ವಾ᳚ ದೇ॒ವಾ ಅಸೃ॑ಜನ್ತ॒ ವಿಶ್ವ॒ ಇಷುಂ᳚ ಕೃಣ್ವಾ॒ನಾ ಅಸ॑ನಾಯ ಧೃ॒ಷ್ಣುಮ್।
ಸಾ ನೋ᳚ ಮೃಡ ವಿ॒ದಥೇ᳚ ಗೃಣಾ॒ನಾ ತಸ್ಯೈ᳚ ತೇ॒ ನಮೋ᳚ ಅಸ್ತು ದೇವಿ ॥೪॥

೧।೧೪ ಕುಲಪಾ ಕನ್ಯಾ

೧-೪ ಭೃಗ್ವಙ್ಗಿರಾಃ ।(ವರುಣೋ), ಯಮೋ (ವಾ)। ಅನುಷ್ಟುಪ್, ೧ ಕಕುಮ್ಮತೀ ಅನುಷ್ಟುಪ್, ೩ ಚತುಷ್ಪಾದ್ವಿರಾಟ್।

ಭಗ॑ಮಸ್ಯಾ॒ ವರ್ಚ॒ ಆದಿ॒ಷ್ಯಧಿ॑ ವೃ॒ಕ್ಷಾದಿ॑ವ॒ ಸ್ರಜ᳚ಮ್।
ಮ॒ಹಾಬು॑ಧ್ನ ಇವ॒ ಪರ್ವ॑ತೋ॒ ಜ್ಯೋಕ್ ಪಿ॒ತೃಷ್ವಾ᳚ಸ್ತಾಮ್॥೧॥
ಏ॒ಷಾ ತೇ᳚ ರಾಜನ್ ಕ॒ನ್ಯಾ᳚ ವ॒ಧೂರ್ನಿ ಧೂ᳚ಯತಾಂ ಯಮ ।
ಸಾ ಮಾ॒ತುರ್ಬ॑ಧ್ಯತಾಂ ಗೃ॒ಹೇಽಥೋ॒ ಭ್ರಾತು॒ರಥೋ᳚ ಪಿ॒ತುಃ ॥೨॥
ಏ॒ಷಾ ತೇ᳚ ಕುಲ॒ಪಾ ರಾ᳚ಜ॒ನ್ ತಾಮು॑ ತೇ॒ ಪರಿ॑ ದದ್ಮಸಿ ।
ಜ್ಯೋಕ್ ಪಿ॒ತೃಷ್ವಾ᳚ಸಾತಾ॒ ಆ ಶೀ॒ರ್ಷ್ಣಃ ಸ॒ಮೋಪ್ಯಾ᳚ತ್॥೩॥
ಅಸಿ॑ತಸ್ಯ ತೇ॒ ಬ್ರಹ್ಮ॑ಣಾ ಕ॒ಶ್ಯಪ॑ಸ್ಯ॒ ಗಯ॑ಸ್ಯ ಚ ।
ಅ॒ನ್ತಃ॒ಕೋ॒ಶಮಿ॑ವ ಜಾ॒ಮಯೋಽಪಿ॑ ನಹ್ಯಾಮಿ ತೇ॒ ಭಗ᳚ಮ್॥೪॥

೧।೧೫ ಪುಷ್ಟಿಕರ್ಮ।

೧-೪ ಅಥರ್ವಾ। ಸಿನ್ಧವಃ,(ವಾತಾಃ, ಪತತ್ರಿಣಃ)। ಅನುಷ್ಟುಪ್, ೧-೨ ಭುರಿಕ್ಪಥ್ಯಾ ಪಙ್ಕ್ತಿಃ।

ಸಂ ಸಂ ಸ್ರ॑ವನ್ತು॒ ಸಿನ್ಧ॑ವಃ॒ ಸಂ ವಾತಾಃ॒ ಸಂ ಪ॑ತ॒ತ್ರಿಣಃ॑ ।
ಇ॒ಮಂ ಯ॒ಜ್ಞಂ ಪ್ರ॒ದಿವೋ᳚ ಮೇ ಜುಷನ್ತಾಂ ಸಂಸ್ರಾ॒ವ್ಯೇ᳚ಣ ಹ॒ವಿಷಾ᳚ ಜುಹೋಮಿ ॥೧॥
ಇ॒ಹೈವ ಹವ॒ಮಾ ಯಾ᳚ತ ಮ ಇ॒ಹ ಸಂ᳚ಸ್ರಾವಣಾ ಉ॒ತೇಮಂ ವ॑ರ್ಧಯತಾ ಗಿರಃ ।
ಇ॒ಹೈತು॒ ಸರ್ವೋ॒ ಯಃ ಪ॒ಶುರ॒ಸ್ಮಿನ್ ತಿ॑ಷ್ಠತು॒ ಯಾ ರ॒ಯಿಃ ॥೨॥
ಯೇ ನ॒ದೀನಾಂ᳚ ಸಂ॒ಸ್ರವ॒ನ್ತ್ಯುತ್ಸಾ᳚ಸಃ॒ ಸದ॒ಮಕ್ಷಿ॑ತಾಃ ।
ತೇಭಿ᳚ರ್ಮೇ॒ ಸರ್ವೈಃ᳚ ಸಂಸ್ರಾ॒ವೈರ್ಧನಂ॒ ಸಂ ಸ್ರಾ᳚ವಯಾಮಸಿ ॥೩॥
ಯೇ ಸ॒ರ್ಪಿಷಃ॑ ಸಂ॒ಸ್ರವ᳚ನ್ತಿ ಕ್ಷೀ॒ರಸ್ಯ॑ ಚೋದ॒ಕಸ್ಯ॑ ಚ ।
ತೇಭಿ᳚ರ್ಮೇ॒ ಸರ್ವೈಃ᳚ ಸಂಸ್ರಾ॒ವೈರ್ಧನಂ॒ ಸಂ ಸ್ರಾ᳚ವಯಾಮಸಿ ॥೪॥

೧।೧೬ ಶತ್ರುಬಾಧನಮ್।

೧-೪ ಚಾತನಃ। ೧ ಅಗ್ನಿಃ, ೨ ಇನ್ದ್ರಃ, ವರುಣಃ, (೨-೪ ದಧತ್ಯಂ ಸೀಸಮ್)। ಅನುಷ್ಟುಪ್, ೪ ಕಕುಮ್ಮತೀ ಅನುಷ್ಟುಪ್।

ಯೇಽಮಾವಾ॒ಸ್ಯಾಂ॒೩ ರಾತ್ರಿ॑ಮು॒ದಸ್ಥು॑ರ್ವ್ರಾ॒ಜಮ॒ತ್ತ್ರಿಣಃ॑ ।
ಅ॒ಗ್ನಿಸ್ತು॒ರೀಯೋ᳚ ಯಾತು॒ಹಾ ಸೋ ಅ॒ಸ್ಮಭ್ಯ॒ಮಧಿ॑ ಬ್ರವತ್॥೧॥
ಸೀಸಾ॒ಯಾಧ್ಯಾ᳚ಹ॒ ವರು॑ಣಃ॒ ಸೀಸಾ᳚ಯಾ॒ಗ್ನಿರುಪಾ᳚ವತಿ ।
ಸೀಸಂ᳚ ಮ॒ ಇನ್ದ್ರಃ॒ ಪ್ರಾಯ॑ಚ್ಛ॒ತ್ ತದ॒ಙ್ಗ ಯಾ᳚ತು॒ಚಾತ॑ನಮ್॥೨॥
ಇ॒ದಂ ವಿಷ್ಕ᳚ನ್ಧಂ ಸಹತ ಇ॒ದಂ ಬಾ᳚ಧತೇ ಅ॒ತ್ತ್ರಿಣಃ॑ ।
ಅ॒ನೇನ॒ ವಿಶ್ವಾ᳚ ಸಸಹೇ॒ ಯಾ ಜಾ॒ತಾನಿ॑ ಪಿಶಾ॒ಚ್ಯಾಃ ॥೩॥
ಯದಿ॑ ನೋ॒ ಗಾಂ ಹಂಸಿ॒ ಯದ್ಯಶ್ವಂ॒ ಯದಿ॒ ಪೂರು॑ಷಮ್।
ತಂ ತ್ವಾ॒ ಸೀಸೇ᳚ನ ವಿಧ್ಯಾಮೋ॒ ಯಥಾ॒ ನೋಽಸೋ॒ ಅವೀ᳚ರಹಾ ॥೪॥

೧।೧೭ ರುಧಿರಸ್ರಾವನಿವೃತ್ತಯೇ ಧಮನೀಬನ್ಧನಮ್।

೧-೪ ಬ್ರಹ್ಮಾ। ಯೋಷಿತಃ ಧಮನ್ಯಶ್ಚ। ಅನುಷ್ಟುಪ್, ೧ ಭುರಿಗನುಷ್ಟುಪ್, ೪ ತ್ರಿಪದಾರ್ಷೀ ಗಾಯತ್ರೀ।

ಅ॒ಮೂರ್ಯಾ ಯನ್ತಿ॑ ಯೋ॒ಷಿತೋ᳚ ಹಿ॒ರಾ ಲೋಹಿ॑ತವಾಸಸಃ ।
ಅ॒ಭ್ರಾತ॑ರ ಇವ ಜಾ॒ಮಯ॒ಸ್ತಿಷ್ಠ᳚ನ್ತು ಹ॒ತವ॑ರ್ಚಸಃ ॥೧॥
ತಿಷ್ಠಾ᳚ವರೇ॒ ತಿಷ್ಠ॑ ಪರ ಉ॒ತ ತ್ವಂ ತಿ॑ಷ್ಠ ಮಧ್ಯಮೇ ।
ಕ॒ನಿ॒ಷ್ಠಿ॒ಕಾ ಚ॒ ತಿಷ್ಠ॑ತಿ॒ ತಿಷ್ಠಾ॒ದಿದ್ಧ॒ಮನಿ॑ರ್ಮ॒ಹೀ॥೨॥
ಶ॒ತಸ್ಯ॑ ಧ॒ಮನೀ᳚ನಾಂ ಸ॒ಹಸ್ರ॑ಸ್ಯ ಹಿ॒ರಾಣಾ᳚ಮ್।
ಅಸ್ಥು॒ರಿನ್ಮ॑ಧ್ಯ॒ಮಾ ಇ॒ಮಾಃ ಸಾ॒ಕಮನ್ತಾ᳚ ಅರಂಸತ ॥೩॥
ಪರಿ॑ ವಃ॒ ಸಿಕ॑ತಾವತೀ ಧ॒ನೂರ್ಬೃ॑ಹ॒ತ್ಯಽಕ್ರಮೀತ್। ತಿಷ್ಠ॑ತೇ॒ಲಯ॑ತಾ॒ ಸು ಕ᳚ಮ್॥೪॥

೧।೧೮ ಅಲಕ್ಷ್ಮೀನಾಶನಮ್।

೧-೪ ದ್ರವಿಣೋದಾಃ। ವಿನಾಯಕಃ(೨ ಸವಿತಾ, ವರುಣಃ, ಮಿತ್ರಃ, ಅರ್ಯಮಾ, ದೇವಾಃ, ೩ ಸವಿತಾ)। ೧ ವಿರಾಡುಪರಿಷ್ಟಾದ್ ಬೃಹತೀ, ೨ ನಿಚೃಜ್ಜಗತೀ, ೩ ವಿರಾಡಾಸ್ತಾರ ಪಙ್ಕ್ತಿಸ್ತ್ರಿಷ್ಟುಪ್, ೪ ಅನುಷ್ಟುಪ್।

ನಿರ್ಲ॒ಕ್ಷ್ಮ್ಯಂ∫ಲಲಾ॒ಮ್ಯಂ॑೧ ನಿರರಾ᳚ತಿಂ ಸುವಾಮಸಿ ।
ಅಥ॒ ಯಾ ಭ॒ದ್ರಾ ತಾನಿ॑ ನಃ ಪ್ರ॒ಜಾಯಾ॒ ಅರಾ᳚ತಿಂ ನಯಾಮಸಿ ॥೧॥
ನಿರರ॑ಣಿಂ ಸವಿ॒ತಾ ಸಾ᳚ವಿಷಕ್ ಪ॒ದೋರ್ನಿರ್ಹಸ್ತ॑ಯೋ॒ರ್ವರು॑ಣೋ ಮಿ॒ತ್ರೋ ಅ᳚ರ್ಯ॒ಮಾ।
ನಿರ॒ಸ್ಮಭ್ಯ॒ಮನು॑ಮತೀ॒ ರರಾ᳚ಣಾ॒ ಪ್ರೇಮಾಂ ದೇ॒ವಾ ಅ॑ಸಾವಿಷುಃ॒ ಸೌಭ॑ಗಾಯ ॥೨॥
ಯತ್ ತ॑ ಆ॒ತ್ಮನಿ॑ ತ॒ನ್ವಾಂ∫ಘೋ॒ರಮಸ್ತಿ॒ ಯದ್ವಾ॒ ಕೇಶೇ᳚ಷು ಪ್ರತಿ॒ಚಕ್ಷ॑ಣೇ ವಾ ।
ಸರ್ವಂ॒ ತದ್ವಾ॒ಚಾಪ॑ ಹನ್ಮೋ ವ॒ಯಂ ದೇ॒ವಸ್ತ್ವಾ᳚ ಸವಿ॒ತಾ ಸೂ᳚ದಯತು ॥೩॥
ರಿಶ್ಯ॑ಪದೀಂ॒ ವೃಷ॑ದತೀಂ ಗೋಷೇ॒ಧಾಂ ವಿ॑ಧ॒ಮಾಮು॒ತ।
ವಿ॒ಲೀ॒ಢ್ಯಂ∫ಲಲಾ॒ಮ್ಯಂ॑೧ ತಾ ಅ॒ಸ್ಮನ್ನಾ᳚ಶಯಾಮಸಿ ॥೪॥

೧।೧೯ ಶತ್ರುನಿವಾರಣಮ್।

೧-೪ ಬ್ರಹ್ಮಾ। ಈಶ್ವರಃ, (೧ ಇನ್ದ್ರಃ, ೨ ದೈವೀಃ ಮನುಷ್ಯೇಷವಃ, ೩ ರುದ್ರಃ, ೪ ದೇವಾಃ)।
ಅನುಷ್ಟುಪ್, ೨ ಪುರಸ್ತಾದ್ ಬೃಹತೀ, ೩ ಪಥ್ಯಾಪಙ್ಕ್ತಿಃ।

ಮಾ ನೋ᳚ ವಿದನ್ ವಿವ್ಯಾ॒ಧಿನೋ॒ ಮೋ ಅ॑ಭಿವ್ಯಾ॒ಧಿನಂ᳚ ವಿದನ್।
ಆ॒ರಾಚ್ಛ॑ರ॒ವ್ಯಾ∫ಅ॒ಸ್ಮದ್ವಿಷೂ॑ಚೀರಿನ್ದ್ರ ಪಾತಯ ॥೧॥
ವಿಷ್ವ᳚ಞ್ಚೋ ಅ॒ಸ್ಮಚ್ಛರ॑ವಃ ಪತನ್ತು॒ ಯೇ ಅ॒ಸ್ತಾ ಯೇ ಚಾ॒ಸ್ಯಾಃ᳚ ।
ದೈವೀ᳚ರ್ಮನುಷ್ಯೇಷವೋ॒ ಮಮಾ॒ಮಿತ್ರಾ∫ನ್ ವಿ ವಿ॑ಧ್ಯತ ॥೨॥
ಯೋ ನಃ॒ ಸ್ವೋ ಯೋ ಅರ॑ಣಃ ಸಜಾ॒ತ ಉ॒ತ ನಿಷ್ಟ್ಯೋ॒ ಯೋ ಅ॒ಸ್ಮಾಁ ಅ॑ಭಿ॒ದಾಸ॑ತಿ ।
ರು॒ದ್ರಃ ಶ॑ರವ್ಯ∫ಯೈ॒ತಾನ್ ಮಮಾ॒ಮಿತ್ರಾ∫ನ್ ವಿ ವಿ॑ಧ್ಯತು ॥೩॥
ಯಃ ಸ॒ಪತ್ನೋ॒ ಯೋಽಸ॑ಪತ್ನೋ॒ ಯಶ್ಚ॑ ದ್ವಿ॒ಷನ್ ಛಪಾ᳚ತಿ ನಃ ।
ದೇ॒ವಾಸ್ತಂ ಸರ್ವೇ᳚ ಧೂರ್ವನ್ತು॒ ಬ್ರಹ್ಮ॒ ವರ್ಮ॒ ಮಮಾನ್ತ॑ರಮ್॥೪॥

೧।೨೦ ಶತ್ರುನಿವಾರಣಮ್।

೧-೪ ಅಥರ್ವಾ। ೧ ಸೋಮಃ, ಮರುತಃ, ೨ ಮಿತ್ರಾವರುಣೌ, ೩ ವರುಣಃ ೪ ಇನ್ದ್ರಃ। ಅನುಷ್ಟುಪ್, ತ್ರಿಷ್ಟುಪ್।

ಅದಾ᳚ರಸೃದ್ ಭವತು ದೇವ ಸೋಮಾ॒∫ಸ್ಮಿನ್ ಯ॒ಜ್ಞೇ ಮ॑ರುತೋ ಮೃ॒ಡತಾ᳚ ನಃ ।
ಮಾ ನೋ᳚ ವಿದದಭಿ॒ಭಾ ಮೋ ಅಶ॑ಸ್ತಿ॒ರ್ಮಾ ನೋ᳚ ವಿದದ್ ವೃಜಿ॒ನಾ ದ್ವೇಷ್ಯಾ॒ ಯಾ॥೧॥
ಯೋ ಅ॒ದ್ಯ ಸೇನ್ಯೋ᳚ ವ॒ಧೋ∫ ಘಾ॒ಯೂನಾ᳚ಮು॒ದೀರ॑ತೇ ।
ಯು॒ವಂ ತಂ ಮಿ॑ತ್ರಾವರುಣಾವ॒ಸ್ಮದ್ಯಾ᳚ವಯತಂ॒ ಪರಿ॑ ॥೨॥
ಇ॒ತಶ್ಚ॒ ಯದ॒ಮುತ॑ಶ್ಚ॒ ಯದ್ ವ॒ಧಂ ವ॑ರುಣ ಯಾವಯ ।
ವಿ ಮ॒ಹಚ್ಛರ್ಮ॑ ಯಚ್ಛ॒ ವರೀ᳚ಯೋ ಯಾವಯಾ ವ॒ಧಮ್॥೩॥
ಶಾ॒ಸ ಇ॒ತ್ಥಾ ಮ॒ಹಾಁ ಅ॑ಸ್ಯಮಿತ್ರಸಾ॒ಹೋ ಅ॑ಸ್ತೃ॒ತಃ ।
ನ ಯಸ್ಯ॑ ಹ॒ನ್ಯತೇ॒ ಸಖಾ॒ ನ ಜೀ॒ಯತೇ᳚ ಕ॒ದಾ ಚ॒ನ॥೪॥

೧।೨೧ ಶತ್ರುನಿವಾರಣಮ್।

೧-೪ ಅಥರ್ವಾ। ಇನ್ದ್ರಃ। ಅನುಷ್ಟುಪ್।

ಸ್ವಸ್ತಿ॒ದಾ ವಿ॒ಶಾಂ ಪತಿ॑ರ್ವೃತ್ರ॒ಹಾ ವಿ॑ಮೃ॒ಧೋ॑ ವ॒ಶೀ।
ವೃಷೇನ್ದ್ರಃ॑ ಪು॒ರ ಏ᳚ತು ನಃ ಸೋಮ॒ಪಾ ಅ॑ಭಯಂಕ॒ರಃ ॥೧॥
ವಿ ನ॑ ಇನ್ದ್ರ॒ ಮೃಧೋ᳚ ಜಹಿ ನೀಚಾ॒ ಯ॑ಚ್ಛ ಪೃತನ್ಯ॒ತಃ ।
ಅ॒ಧ॒ಮಂ ಗ॑ಮಯಾ॒ ತಮೋ॒ ಯೋ ಅ॒ಸ್ಮಾಁ ಅ॑ಭಿ॒ದಾಸ॑ತಿ ॥೨॥
ವಿ ರಕ್ಷೋ॒ ವಿ ಮೃಧೋ᳚ ಜಹಿ ವಿ ವೃ॒ತ್ರಸ್ಯ॒ ಹನೂ᳚ ರುಜ ।
ವಿ ಮ॒ನ್ಯುಮಿ᳚ನ್ದ್ರ ವೃತ್ರಹನ್ನ॒ಮಿತ್ರ॑ಸ್ಯಾಭಿ॒ದಾಸ॑ತಃ ॥೩॥
ಅಪೇ᳚ನ್ದ್ರ ದ್ವಿಷ॒ತೋ ಮನೋಽಪ॒ ಜಿಜ್ಯಾ᳚ಸತೋ ವ॒ಧಮ್।
ವಿ ಮಹಚ್ಛರ್ಮ॑ ಯಚ್ಛ॒ ವರೀ᳚ಯೋ ಯಾವಯಾ ವ॒ಧಮ್॥೪॥

೧।೨೨ ಹೃದ್ರೋಗ-ಕಾಮಿಲಾ-ನಾಶನಮ್।

೧-೪ ಬ್ರಹ್ಮಾ। ಸೂರ್ಯೋ, ಹರಿಮಾ ಹೃದ್ರೋಗಶ್ಚ। ಅನುಷ್ಟುಪ್।

ಅನು॒ ಸೂರ್ಯ॒ಮುದ॑ಯತಾಂ ಹೃದ್ದಯೋ॒ತೋ ಹ॑ರಿ॒ಮಾ ಚ॑ ತೇ ।
ಗೋ ರೋಹಿ॑ತಸ್ಯ॒ ವರ್ಣೇ᳚ನ॒ ತೇನ॑ ತ್ವಾ॒ ಪರಿ॑ ದಧ್ಮಸಿ ॥೧॥
ಪರಿ॑ ತ್ವಾ॒ ರೋಹಿ॑ತೈ॒ರ್ವರ್ಣೈ᳚ರ್ದೀರ್ಘಾಯು॒ತ್ವಾಯ॑ ದಧ್ಮಸಿ ।
ಯಥಾ॒ಯಮ॑ರ॒ಪಾ ಅಸ॒ದಥೋ॒ ಅಹ॑ರಿತೋ॒ ಭುವ॑ತ್॥೨॥
ಯಾ ರೋಹಿ॑ಣೀರ್ದೇವ॒ತ್ಯಾ॒೩ ಗಾವೋ॒ ಯಾ ಉ॒ತ ರೋಹಿ॑ಣೀಃ ।
ರೂ॒ಪಂರೂ᳚ಪಂ ವಯೋ᳚ವಯ॒ಸ್ತಾಭಿ॑ಷ್ಟ್ವಾ॒ ಪರಿ॑ ದಧ್ಮಸಿ ॥೩॥
ಶುಕೇ᳚ಷು ತೇ ಹರಿ॒ಮಾಣಂ᳚ ರೋಪ॒ಣಾಕಾ᳚ಸು ದಧ್ಮಸಿ ।
ಅಥೋ॒ ಹಾರಿ॑ದ್ರವೇಷು ತೇ ಹರಿ॒ಮಾಣಂ॒ ನಿ ದ॑ಧ್ಮಸಿ ॥೪॥

೧।೨೩ ಶತ್ರುನಿವಾರಣಮ್।

೧-೪ ಅಥರ್ವಾ। ವನಸ್ಪತಿಃ(ಅಸಿಕ್ನಿಃ)। ಅನುಷ್ಟುಪ್।

ನ॒ಕ್ತಂ॒ಜಾ॒ತಾಸ್ಯೋ᳚ಷಧೇ॒ ರಾಮೇ॒ ಕೃಷ್ಣೇ॒ ಅಸಿ॑ಕ್ನಿ ಚ ।
ಇ॒ದಂ ರ॑ಜನಿ ರಜಯ ಕಿ॒ಲಾಸಂ᳚ ಪಲಿ॒ತಂ ಚ॒ ಯತ್॥೧॥
ಕಿ॒ಲಾಸಂ᳚ ಚ ಪಲಿ॒ತಂ ಚ॒ ನಿರಿ॒ತೋ ನಾ᳚ಶಯಾ॒ ಪೃಷ॑ತ್।
ಆ ತ್ವಾ॒ ಸ್ವೋ ವಿ॑ಶತಾಂ॒ ವರ್ಣಃ॒ ಪರಾ᳚ ಶು॒ಕ್ಲಾನಿ॑ ಪಾತಯ ॥೨॥
ಅಸಿ॑ತಂ ತೇ ಪ್ರ॒ಲಯ॑ನಮಾ॒ಸ್ಥಾನ॒ಮಸಿ॑ತಂ॒ ತವ॑ ।
ಅಸಿ॑ಕ್ನ್ಯಸ್ಯೋಷಧೇ॒ ನಿರಿ॒ತೋ ನಾ᳚ಶಯಾ॒ ಪೃಷ॑ತ್॥೩॥
ಅ॒ಸ್ಥಿ॒ಜಸ್ಯ॑ ಕಿ॒ಲಾಸ॑ಸ್ಯ ತನೂ॒ಜಸ್ಯ॑ ಚ॒ ಯತ್ ತ್ವ॒ಚಿ।
ದೂಷ್ಯಾ᳚ ಕೃ॒ತಸ್ಯ॒ ಬ್ರಹ್ಮ॑ಣಾ॒ ಲಕ್ಷ್ಮ॑ ಶ್ವೇ॒ತಮ॑ನೀನಶಮ್॥೪॥

೧।೨೪ ಶತ್ರುನಿವಾರಣಮ್।

೧-೪ ಬ್ರಹ್ಮಾ। ಆಸುರೀ ವನಸ್ಪತಿಃ। ಅನುಷ್ಟುಪ್, ೨ ನಿಚೃತ್ಪಥ್ಯಾಪಙ್ಕ್ತಿಃ।

ಸು॒ಪ॒ರ್ಣೋ ಜಾ॒ತಃ ಪ್ರ॑ಥ॒ಮಸ್ತಸ್ಯ॒ ತ್ವಂ ಪಿ॒ತ್ತಮಾ᳚ಸಿಥ ।
ತದಾ᳚ಸು॒ರೀ ಯು॒ಧಾ ಜಿ॒ತಾ ರೂ॒ಪಂ ಚ॑ಕ್ರೇ॒ ವನ॒ಸ್ಪತೀ᳚ನ್॥೧॥
ಆ॒ಸು॒ರೀ ಚ॑ಕ್ರೇ ಪ್ರಥ॒ಮೇದಂ ಕಿ॑ಲಾಸಭೇಷ॒ಜಮಿ॒ದಂ ಕಿ॑ಲಾಸ॒ನಾಶ॑ನಮ್।
ಅನೀ᳚ನಶತ್ ಕಿ॒ಲಾಸಂ॒ ಸರೂ᳚ಪಾಮಕರ॒ತ್ ತ್ವಚ᳚ಮ್॥೨॥
ಸರೂ᳚ಪಾ॒ ನಾಮ॑ ತೇ ಮಾ॒ತಾ ಸರೂ᳚ಪೋ॒ ನಾಮ॑ ತೇ ಪಿ॒ತಾ।
ಸ॒ರೂ॒ಪ॒ಕೃತ್ ತ್ವಮೋ᳚ಷಧೇ॒ ಸಾ ಸರೂ᳚ಪಮಿ॒ದಂ ಕೃ॑ಧಿ ॥೩॥
ಶ್ಯಾ॒ಮಾ ಸ॑ರೂಪಂ॒ಕರ॑ಣೀ ಪೃಥಿ॒ವ್ಯಾ ಅಧ್ಯುದ್ಭೃ॑ತಾ ।
ಇ॒ದಮೂ॒ ಷು ಪ್ರ ಸಾ᳚ಧಯ॒ ಪುನಾ᳚ ರೂ॒ಪಾಣಿ॑ ಕಲ್ಪಯ ॥೪॥

೧।೨೫ ಜ್ವರ-ನಾಶನಮ್।

೧-೪ ಭೃಗ್ವಙ್ಗಿರಾಃ । ಯಕ್ಷ್ಮನಾಶನೋಽಗ್ನಿಃ। ತ್ರಿಷ್ಟುಪ್,೨-೩ ವಿರಾಡ್ ಗರ್ಭಾ, ೪ಪುರೋಽನುಷ್ಟುಪ್।

ಯದ॒ಗ್ನಿರಾಪೋ॒ ಅದ॑ಹತ್ ಪ್ರ॒ವಿಶ್ಯ॒ ಯತ್ರಾಕೃ᳚ಣ್ವನ್ ಧರ್ಮ॒ಧೃತೋ॒ ನಮಾಂ᳚ಸಿ ।
ತತ್ರ॑ ತ ಆಹುಃ ಪರ॒ಮಂ ಜ॒ನಿತ್ರಂ॒ ಸ ನಃ॑ ಸಂವಿ॒ದ್ವಾನ್ ಪರಿ॑ ವೃಙ್ಗ್ಧಿ ತಕ್ಮನ್॥೧॥
ಯದ್ಯ॒ರ್ಚಿ॑ರ್ಯದಿ॒ ವಾಸಿ॑ ಶೋ॒ಚಿಃ ಶ॑ಕಲ್ಯೇ॒ಷಿ ಯದಿ॑ ವಾ ತೇ ಜ॒ನಿತ್ರ᳚ಮ್।
ಹ್ರೂಡು॒ರ್ನಾಮಾ᳚ಸಿ ಹರಿತಸ್ಯ ದೇವ॒ ಸ ನಃ॑ ಸಂವಿ॒ದ್ವಾನ್ ಪರಿ॑ ವೃಙ್ಗ್ಧಿ ತಕ್ಮನ್॥೨॥
ಯದಿ॑ ಶೋ॒ಕೋ ಯದಿ॑ ವಾಭಿಶೋ॒ಕೋ ಯದಿ॑ ವಾ॒ ರಾಜ್ಞೋ॒ ವರು॑ಣ॒ಸ್ಯಾಸಿ॑ ಪು॒ತ್ರಃ ।
ಹ್ರೂ॒ಡು॒ರ್ನಾಮಾ᳚ಸಿ ಹರಿತಸ್ಯ ದೇವ॒ ಸ ನಃ॑ ಸಂವಿ॒ದ್ವಾನ್ ಪರಿ॑ ವೃಙ್ಗ್ಧಿ ತಕ್ಮನ್॥೩॥
ನಮಃ॑ ಶೀ॒ತಾಯ॑ ತ॒ಕ್ಮನೇ॒ ನಮೋ᳚ ರೂ॒ರಾಯ॑ ಶೋ॒ಚಿಷೇ᳚ ಕೃಣೋಮಿ ।
ಯೋ ಅ᳚ನ್ಯೇ॒ದ್ಯುರು॑ಭಯ॒ದ್ಯುರ॒ಭ್ಯೇತಿ॒ ತೃತೀ᳚ಯಕಾಯ॒ ನಮೋ᳚ ಅಸ್ತು ತ॒ಕ್ಮನೇ᳚ ॥೪॥

೧।೨೬ ಶರ್ಮಪ್ರಾಪ್ತಿಃ।

೧-೪ ಬ್ರಹ್ಮಾ। ೧ ದೇವಾಃ, ೨ ಇನ್ದ್ರಃ, ಭಗಃ, ಸವಿತಾ, ೩-೪ ಮರುತಃ। ಗಾಯತ್ರೀ,
೨ ತ್ರಿಪದಾ ಏಕಾವಸಾನಾ ಸಾಮ್ನೀ ತ್ರಿಷ್ಟುಪ್, ೪ ಏಕಾವಸಾನಾ ಪಾದನಿಚೃತ್।

ಆ॒ರೇ॒೩ಸಾವ॒ಸ್ಮದ॑ಸ್ತು ಹೇ॒ತಿರ್ದೇ᳚ವಾಸೋ ಅಸತ್। ಆ॒ರೇ ಅಶ್ಮಾ॒ ಯಮಸ್ಯ॑ಥ ॥೧॥
ಸಖಾ॒ಸಾವ॒ಸ್ಮಭ್ಯ॑ಮಸ್ತು ರಾ॒ತಿಃ ಸಖೇನ್ದ್ರೋ॒ ಭಗಃ॑ ಸವಿ॒ತಾ ಚಿ॒ತ್ರರಾ᳚ಧಾಃ ॥೨॥
ಯೂ॒ಯಂ ನಃ॑ ಪ್ರವತೋ ನಪಾ॒ನ್ಮರು॑ತಃ॒ ಸೂರ್ಯ॑ತ್ವಚಸಃ । ಶರ್ಮ॑ ಯಚ್ಛಾಥ ಸ॒ಪ್ರಥಾಃ᳚ ॥೩॥
ಸು॒ಷೂ॒ದತ॑ ಮೃ॒ಡತ॑ ಮೃ॒ಡಯಾ᳚ ನಸ್ತ॒ನೂಭ್ಯೋ॒ ಮಯ॑ಸ್ತೋ॒ಕೇಭ್ಯ॑ಸ್ಕೃಧಿ॑॥೪॥

೧।೨೭ ಸ್ವಸ್ತ್ಯಯನಮ್।

೧-೪ ಅಥರ್ವಾ(ಸ್ವಸ್ತ್ಯಯನಕಾಮಃ)। (ಚನ್ದ್ರಮಾಃ,) ಇನ್ದ್ರಣೀ (ಚ)। ಅನುಷ್ಟುಪ್, ೧ ಪಥ್ಯಾಪಙ್ಕ್ತಿಃ।

ಅ॒ಮೂಃ ಪಾ॒ರೇ ಪೃ॑ದಾ॒ಕ್ವ ಽ ಸ್ತ್ರಿಷ॒ಪ್ತಾ ನಿರ್ಜ॑ರಾಯವಃ ।
ತಾಸಾಂ᳚ ಜ॒ರಾಯು॑ಭಿರ್ವ॒ಯಮ॒ಕ್ಷ್ಯಾ॒೩ವಪಿ॑ ವ್ಯಯಾಮಸ್ಯಘಾ॒ಯೋಃ ಪ॑ರಿಪ॒ನ್ಥಿನಃ॑ ॥೧॥
ವಿಷೂ᳚ಚ್ಯೇತು ಕೃನ್ತ॒ತೀ ಪಿನಾ᳚ಕಮಿವ॒ ಬಿಭ್ರ॑ತೀ ।
ವಿಷ್ವ॑ಕ್ ಪುನ॒ರ್ಭುವಾ॒ ಮನೋಽಸ॑ಮೃದ್ಧಾ ಅಘಾ॒ಯವಃ॑ ॥೨॥
ನ ಬ॒ಹವಃ॒ ಸಮ॑ಶಕ॒ನ್ ನಾರ್ಭ॒ಕಾ ಅ॒ಭಿ ದಾ᳚ಧೃಷುಃ ।
ವೇ॒ಣೋರದ್ಗಾ᳚ ಇವಾ॒ಭಿತೋಽಸ॑ಮೃದ್ಧಾ ಅಘಾ॒ಯವಃ॑ ॥೩॥
ಪ್ರೇತಂ᳚ ಪಾದೌ॒ ಪ್ರ ಸ್ಫು॑ರತಂ॒ ವಹ॑ತಂ ಪೃಣ॒ತೋ ಗೃ॒ಹಾನ್।
ಇ॒ನ್ದ್ರಾ॒ಣ್ಯೇ∫ತು ಪ್ರಥ॒ಮಾಜೀ॒ತಾಮು॑ಷಿತಾ ಪು॒ರಃ ॥೪॥

೧।೨೮ ರಕ್ಷೋಘ್ನಮ್।

೧-೪ ಚಾತನಃ। ೧-೨ ಅಗ್ನಿಃ, ೩-೪ ಯಾತುಧಾನೀಃ। ಅನುಷ್ಟುಪ್, ೩ ವಿರಾಟ್ ಪಥ್ಯಾಬೃಹತೀ, ೪ ಪಥ್ಯಾಪಙ್ಕ್ತಿಃ।

ಉಪ॒ ಪ್ರಾಗಾ᳚ದ್ ದೇ॒ವೋ ಅ॒ಗ್ನೀ ರ॑ಕ್ಷೋ॒ಹಾಮೀ᳚ವ॒ಚಾತ॑ನಃ ।
ದಹ॒ನ್ನಪ॑ ದ್ವಯಾ॒ವಿನೋ᳚ ಯಾತು॒ಧಾನಾ᳚ನ್ ಕಿಮೀ॒ದಿನಃ॑ ॥೧॥
ಪ್ರತಿ॑ ದಹ ಯಾತು॒ಧಾನಾ॒ನ್ ಪ್ರತಿ॑ ದೇವ ಕಿಮೀ॒ದಿನಃ॑ ।
ಪ್ರ॒ತೀಚೀಃ᳚ ಕೃಷ್ಣವರ್ತನೇ॒ ಸಂ ದ॑ಹ ಯಾತುಧಾ॒ನ್ಯಃ ॥೨॥
ಯಾ ಶ॒ಶಾಪ॒ ಶಪ॑ನೇನ॒ ಯಾಘಂ ಮೂರ॑ಮಾದ॒ಧೇ।
ಯಾ ರಸ॑ಸ್ಯ॒ ಹರ॑ಣಾಯ ಜಾ॒ತಮಾ᳚ರೇ॒ಭೇ ತೋ॒ಕಮ॑ತ್ತು॒ ಸಾ॥೩॥
ಪು॒ತ್ರಮ॑ತ್ತು ಯಾತುಧಾ॒ನೀಃ ಸ್ವಸಾ॑ರಮು॒ತ ನ॒ಪ್ತ್ಯ∫ಮ್।
ಅಧಾ᳚ ಮಿ॒ಥೋ ವಿ॑ಕೇ॒ಶ್ಯೋ॒೩ವಿ ಘ್ನ॑ತಾಂ ಯಾತುಧಾ॒ನ್ಯೋ॒೩ವಿ ತೃ॑ಹ್ಯನ್ತಾಮರಾ॒ಯ್ಯಃ ॥೪॥

೧।೨೯ ರಾಷ್ಟ್ರಾಭಿವರ್ಧನಮ್, ಸಪತ್ನಕ್ಷಯಣಂ ಚ।

೧-೬ ವಸಿಷ್ಠಃ। ಬ್ರಹ್ಮಣಸ್ಪತಿಃ, ಅಭೀವರ್ತಮಣಿಃ। ಅನುಷ್ಟುಪ್।

ಅ॒ಭೀ॒ವ॒ರ್ತೇನ॑ ಮ॒ಣಿನಾ॒ ಯೇನೇನ್ದ್ರೋ᳚ ಅಭಿವಾವೃ॒ಧೇ॑।
ತೇನಾ॒ಸ್ಮಾನ್ ಬ್ರ᳚ಹ್ಮಣಸ್ಪತೇ॒ಽಭಿ ರಾ॒ಷ್ಟ್ರಾಯ॑ ವರ್ಧಯ ॥೧॥
ಅ॒ಭಿ॒ವೃತ್ಯ॑ ಸ॒ಪತ್ನಾ᳚ನ॒ಭಿ ಯಾ ನೋ॒ ಅರಾ᳚ತಯಃ ।
ಅಭಿ ಪೃ॑ತ॒ನ್ಯನ್ತಂ᳚ ತಿಷ್ಠಾ॒ಭಿ ಯೋ ನೋ᳚ ದುರ॒ಸ್ಯತಿ॑ ॥೨॥
ಅ॒ಭಿ ತ್ವಾ᳚ ದೇ॒ವಃ ಸ॑ವಿ॒ತಾಭಿ ಸೋಮೋ᳚ ಅವೀವೃಧತ್।
ಅ॒ಭಿ ತ್ವಾ॒ ವಿಶ್ವಾ᳚ ಭೂ॒ತಾನ್ಯ॑ಭೀವ॒ರ್ತೋ ಯಥಾಸ॑ಸಿ ॥೩॥
ಅ॒ಭೀ॒ವ॒ರ್ತೋ ಅ॑ಭಿಭ॒ವಃ ಸ॑ಪತ್ನ॒ಕ್ಷಯ॑ಣೋ ಮ॒ಣಿಃ ।
ರಾ॒ಷ್ಟ್ರಾಯ॒ ಮಹ್ಯಂ᳚ ಬಧ್ಯತಾಂ ಸ॒ಪತ್ನೇ᳚ಭ್ಯಃ ಪರಾ॒ಭುವೇ᳚ ॥೪॥
ಉದ॒ಸೌ ಸೂರ್ಯೋ᳚ ಅಗಾ॒ದುದಿ॒ದಂ ಮಾ᳚ಮ॒ಕಂ ವಚಃ॑ ।
ಯಥಾ॒ಹಂ ಶ॑ತ್ರು॒ಹೋ∫ಸಾ॑ನ್ಯಸಪತ್ನಃ ಸಪತ್ನಹಾ॑॥೫॥
ಸ॒ಪ॒ತ್ನ॒ಕ್ಷಯ॑ಣೋ॒ ವೃಷಾ॒ಭಿರಾ᳚ಷ್ಟ್ರೋ ವಿಷಾಸ॒ಹಿಃ ।
ಯಥಾ॒ಹಮೇ॒ಷಾಂ ವೀ॒ರಾಣಾಂ᳚ ವಿ॒ರಾಜಾ᳚ನಿ॒ ಜನ॑ಸ್ಯ ಚ ॥೬॥

೧।೩೦ ದೀರ್ಘಾಯುಃಪ್ರಾಪ್ತಿಃ।

೧-೪ ಅಥರ್ವಾ (ಆಯುಷ್ಕಾಮಃ)। ವಿಶ್ವೇದೇವಾಃ (೧ ವಸವಃ, ಆದಿತ್ಯಾಃ, ೧-೪ ದೇವಾಃ)। ತ್ರಿಷ್ಟುಪ್, ೩ ಶಾಕ್ವರಗರ್ಭಾ ವಿರಾಡ್ ಜಗತೀ।

ವಿಶ್ವೇ᳚ ದೇವಾ॒ ವಸ॑ವೋ॒ ರಕ್ಷ॑ತೇ॒ಮಮು॒ತಾದಿ॑ತ್ಯಾ ಜಾಗೃ॒ತ ಯೂ॒ಯಮ॒ಸ್ಮಿನ್।
ಮೇಮಂ ಸನಾ᳚ಭಿರು॒ತ ವಾ॒ನ್ಯನಾ᳚ಭಿ॒ರ್ಮೇಮಂ ಪ್ರಾಪ॒ತ್ ಪೌರು॑ಷೇಯೋ ವ॒ಧೋ ಯಃ ॥೧॥
ಯೇ ವೋ᳚ ದೇವಾಃ ಪಿ॒ತರೋ॒ ಯೇ ಚ॑ ಪು॒ತ್ರಾಃ ಸಚೇ᳚ತಸೋ ಮೇ ಶೃಣುತೇ॒ದಮು॒ಕ್ತಮ್।
ಸರ್ವೇ᳚ಭ್ಯೋ ವಃ॒ ಪ॑ರಿ ದದಾಮ್ಯೇ॒ತಂ ಸ್ವ॒ಸ್ತ್ಯೇ∫ನಂ ಜ॒ರಸೇ᳚ ವಹಾಥ ॥೨॥
ಯೇ ದೇ᳚ವಾ ದಿ॒ವಿ ಷ್ಠ ಯೇ ಪೃ॑ಥಿ॒ವ್ಯಾಂ ಯೇ ಅ॒ನ್ತರಿ॑ಕ್ಷ॒ ಓಷ॑ಧೀಷು ಪ॒ಶುಷ್ವ॒ಪ್ಸ್ವ॑೧ನ್ತಃ ।
ತೇ ಕೃ॑ಣುತ ಜ॒ರಸ॒ಮಾಯು॑ರ॒ಸ್ಮೈ ಶ॒ತಮ॒ನ್ಯಾನ್ ಪರಿ॑ ವೃಣಕ್ತು ಮೃ॒ತ್ಯೂನ್॥೩॥
ಯೇಷಾಂ᳚ ಪ್ರಯಾ॒ಜಾ ಉ॒ತ ವಾ᳚ನುಯಾ॒ಜಾ ಹು॒ತಭಾ᳚ಗಾ ಅಹು॒ತಾದ॑ಶ್ಚ ದೇ॒ವಾಃ ।
ಯೇಷಾಂ᳚ ವಃ॒ ಪಞ್ಚ॑ ಪ್ರ॒ದಿಶೋ॒ ವಿಭ॑ಕ್ತಾ॒ಸ್ತಾನ್ ವೋ᳚ ಅ॒ಸ್ಮೈ ಸ॑ತ್ರ॒ಸದಃ॑ ಕೃಣೋಮಿ ॥೪॥

೧।೩೧ ಪಾಶಮೋಚನಮ್।

೧-೪ ಬ್ರಹ್ಮಾ। ಆಶಾಪಾಲಾಃ,(ವಾಸ್ತೋಷ್ಪತಿಃ)। ಅನುಷ್ಟುಪ್, ೩ ವಿರಾಟ್ ತ್ರಿಷ್ಟುಪ್, ೪ ಪರಾನುಷ್ಟುಪ್ ತ್ರಿಷ್ಟುಪ್।

ಆಶಾ᳚ನಾಮಾಶಾಪಾ॒ಲೇಭ್ಯ॑ಶ್ಚ॒ತುರ್ಭ್ಯೋ᳚ ಅ॒ಮೃತೇ᳚ಭ್ಯಃ ।
ಇ॒ದಂ ಭೂ॒ತಸ್ಯಾಧ್ಯ॑ಕ್ಷೇಭ್ಯೋ ವಿ॒ಧೇಮ॑ ಹ॒ವಿಷಾ᳚ ವ॒ಯಮ್॥೧॥
ಯ ಆಶಾ᳚ನಾಮಾಶಾಪಾ॒ಲಾಶ್ಚ॒ತ್ವಾರ॒ ಸ್ಥನ॑ ದೇವಾಃ ।
ತೇ ನೋ॒ ನಿರೃ॑ತ್ಯಾಃ॒ ಪಾಶೇ᳚ಭ್ಯೋ ಮು॒ಞ್ಚತಾಂಹ॑ಸೋ ಅಂಹಸಃ ॥೨॥
ಅಸ್ರಾ᳚ಮಸ್ತ್ವಾ ಹ॒ವಿಷಾ᳚ ಯಜಾ॒ಮ್ಯಶ್ಲೋ᳚ಣಸ್ತ್ವಾ ಘೃ॒ತೇನ॑ ಜುಹೋಮಿ ।
ಯ ಆಶಾ᳚ನಾಮಾಶಾಪಾ॒ಲಸ್ತು॒ರೀಯೋ᳚ ದೇ॒ವಃ ಸ ನಃ॑ ಸುಭೂ॒ತಮೇಹ ವ॑ಕ್ಷತ್॥೩॥
ಸ್ವ॒ಸ್ತಿ ಮಾ॒ತ್ರ ಉ॒ತ ಪಿ॒ತ್ರೇ ನೋ᳚ ಅಸ್ತು ಸ್ವ॒ಸ್ತಿ ಗೋಭ್ಯೋ॒ ಜಗ॑ತೇ॒ ಪುರು॑ಷೇಭ್ಯಃ ।
ವಿಶ್ವಂ᳚ ಸುಭೂ॒ತಂ ಸು॑ವಿ॒ದತ್ರಂ᳚ ನೋ ಅಸ್ತು॒ ಜ್ಯೋಗೇ॒ವ ದೃ॑ಶೇಮ॒ ಸೂರ್ಯ᳚ಮ್॥೪॥

೧।೩೨ ಮಹದ್ಬ್ರಹ್ಮ।

೧-೪ ಬ್ರಹ್ಮಾ। ದ್ಯಾವಾಪೃಥಿವೀ। ಅನುಷ್ಟುಪ್, ೨ ಕಕುಮ್ಮತ್ಯನುಷ್ಟುಪ್।

ಇ॒ದಂ ಜ॑ನಾಸೋ ವಿ॒ದಥ॑ ಮ॒ಹದ್ ಬ್ರಹ್ಮ॑ ವದಿಷ್ಯತಿ ।
ನ ತತ್ ಪೃ॑ಥಿವ್ಯಾಂ ನೋ ದಿ॒ವಿ ಯೇನ॑ ಪ್ರಾ॒ಣನ್ತಿ॑ ವೀ॒ರುಧಃ॑ ॥೧॥
ಅ॒ನ್ತರಿ॑ಕ್ಷ ಆಸಾಂ॒ ಸ್ಥಾಮ॑ ಶ್ರಾನ್ತ॒ಸದಾ᳚ಮಿವ ।
ಆ॒ಸ್ಥಾನ॑ಮ॒ಸ್ಯ ಭೂ॒ತಸ್ಯ॑ ವಿ॒ದುಷ್ಟದ್ ವೇ॒ಧಸೋ॒ ನ ವಾ᳚ ॥೨॥
ಯದ್ ರೋದ॑ಸೀ॒ ರೇಜ॑ಮಾನೇ॒ ಭೂಮಿ॑ಶ್ಚ ನಿ॒ರತ॑ಕ್ಷತಮ್।
ಆ॒ರ್ದ್ರಂ ತದ॒ದ್ಯ ಸ᳚ರ್ವ॒ದಾ ಸ॑ಮು॒ದ್ರಸ್ಯೇ᳚ವ ಸ್ರೋ॒ತ್ಯಾಃ ॥೩॥
ವಿಶ್ವ॑ಮ॒ನ್ಯಾಮ॑ಭೀ॒ವಾರ॒ ತದ॒ನ್ಯಸ್ಯಾ॒ಮಧಿ॑ಶ್ರಿ॒ತಮ್।
ದಿ॒ವೇ ಚ॑ ವಿ॒ಶ್ವವೇ᳚ದಸೇ ಪೃಥಿ॒ವ್ಯೈ ಚಾ᳚ಕರಂ॒ ನಮಃ॑ ॥೪॥

೧।೩೩ ಆಪಃ।

೧-೪ ಶನ್ತಾತಿಃ।(ಚನ್ದ್ರಮಾಃ) ಆಪಃ(ಚ)। ತ್ರಿಷ್ಟುಪ್।

ಹಿರ᳚ಣ್ಯವರ್ಣಾಃ॒ ಶುಚ॑ಯಃ ಪಾವ॒ಕಾ ಯಾಸು॑ ಜಾ॒ತಃ ಸ॑ವಿ॒ತಾ ಯಾಸ್ವ॒ಗ್ನಿಃ ।
ಯಾ ಅ॒ಗ್ನಿಂ ಗರ್ಭಂ᳚ ದಧಿ॒ರೇ ಸು॒ವರ್ಣಾ॒ಸ್ತಾ ನ॒ ಆಪಃ॒ ಶಂ ಸ್ಯೋ॒ನಾ ಭ॑ವನ್ತು ॥೧॥
ಯಾಸಾಂ॒ ರಾಜಾ॒ ವರು॑ಣೋ॒ ಯಾತಿ॒ ಮಧ್ಯೇ᳚ ಸತ್ಯಾನೃ॒ತೇ ಅ॑ವ॒ಪಶ್ಯ॒ನ್ ಜನಾ᳚ನಾಮ್।
ಯಾ ಅ॒ಗ್ನಿಂ ಗರ್ಭಂ᳚ ದಧಿ॒ರೇ ಸು॒ವರ್ಣಾ॒ಸ್ತಾ ನ॒ ಆಪಃ॒ ಶಂ ಸ್ಯೋ॒ನಾ ಭ॑ವನ್ತು ॥೨॥
ಯಾಸಾಂ᳚ ದೇ॒ವಾ ದಿ॒ವಿ ಕೃ॒ಣ್ವನ್ತಿ॑ ಭ॒ಕ್ಷಂ ಯಾ ಅ॒ನ್ತರಿ॑ಕ್ಷೇ ಬಹು॒ಧಾ ಭವ᳚ನ್ತಿ ।
ಯಾ ಅ॒ಗ್ನಿಂ ಗರ್ಭಂ᳚ ದಧಿ॒ರೇ ಸು॒ವರ್ಣಾ॒ಸ್ತಾ ನ॒ ಆಪಃ॒ ಶಂ ಸ್ಯೋ॒ನಾ ಭ॑ವನ್ತು ॥೩॥
ಶಿ॒ವೇನ॑ ಮಾ॒ ಚಕ್ಷು॑ಷಾ ಪಶ್ಯತಾಪಃ ಶಿ॒ವಯಾ᳚ ತ॒ನ್ವೋಪ॑ ಸ್ಪೃಶತ॒ ತ್ವಚಂ᳚ ಮೇ ।
ಘೃತ॒ಶ್ಚುತಃ॒ ಶುಚ॑ಯೋ॒ ಯಾಃ ಪಾ᳚ವ॒ಕಾಸ್ತಾ ನ॒ ಆಪಃ॒ ಶಂ ಸ್ಯೋ॒ನಾ ಭವನ್ತು ॥೪॥

೧।೩೪ ಮಧುವಿದ್ಯಾ।

೧-೫ ಅಥರ್ವಾ।ಮಧುವನಸ್ಪತಿಃ। ಅನುಷ್ಟುಪ್।

ಇ॒ಯಂ ವೀ॒ರುನ್ಮಧು॑ಜಾತಾ॒ ಮಧು॑ನಾ ತ್ವಾ ಖನಾಮಸಿ ।
ಮಧೋ॒ರಧಿ॒ ಪ್ರಜಾ᳚ತಾಸಿ॒ ಸಾ ನೋ॒ ಮಧು॑ಮತಸ್ಕೃಧಿ ॥೧॥
ಜಿ॒ಹ್ವಾಯಾ॒ ಅಗ್ರೇ॒ ಮಧು॑ ಮೇ ಜಿಹ್ವಾಮೂ॒ಲೇ ಮ॒ಧೂಲ॑ಕಮ್।
ಮಮೇದಹ॒ ಕ್ರತಾ॒ವಸೋ॒ ಮಮ॑ ಚಿ॒ತ್ತಮು॒ಪಾಯ॑ಸಿ ॥೨॥
ಮಧು॑ಮನ್ಮೇ ನಿ॒ಕ್ರಮ॑ಣಂ॒ ಮಧು॑ಮನ್ಮೇ ಪ॒ರಾಯ॑ಣಮ್।
ವಾ॒ಚಾ ವ॑ದಾಮಿ॒ ಮಧು॑ಮದ್ ಭೂ॒ಯಾಸಂ॒ ಮಧು॑ಸಂದೃಶಃ ॥೩॥
ಮಧೋ᳚ರಸ್ಮಿ॒ ಮಧು॑ತರೋ ಮ॒ದುಘಾ॒ನ್ಮಧು॑ಮತ್ತರಃ ।
ಮಾಮಿತ್ ಕಿಲ॒ ತ್ವಂ ವನಾಃ॒ ಶಾಖಾಂ॒ ಮಧು॑ಮತೀಮಿವ ॥೪॥
ಪರಿ॑ ತ್ವಾ ಪರಿತ॒ತ್ನುನೇ॒ಕ್ಷುಣಾ᳚ಗಾ॒ಮವಿ॑ದ್ವಿಷೇ ।
ಯಥಾ॒ ಮಾಂ ಕಾ॒ಮಿನ್ಯಸೋ॒ ಯಥಾ॒ ಮನ್ನಾಪ॑ಗಾ॒ ಅಸಃ॑ ॥೫॥

೧।೩೫ ದೀರ್ಘಾಯುಃಪ್ರಾಪ್ತಿಃ।

೧-೪ ಅಥರ್ವಾ(ಆಯುಷ್ಕಾಮಃ)। ಹಿರಣ್ಯಮ್, ಇನ್ದ್ರಾಗ್ನೀ, ವಿಶ್ವೇ ದೇವಾಃ। ಜಗತೀ, ೪ ಅನುಷ್ಟುಬ್ಗರ್ಭಾ ಚತುಷ್ಪದಾ ತ್ರಿಷ್ಟುಪ್।

ಯದಾಬ॑ಧ್ನನ್ ದಾಕ್ಷಾಯ॒ಣಾ ಹಿರ᳚ಣ್ಯಂ ಶ॒ತಾನೀ᳚ಕಾಯ ಸುಮನ॒ಸ್ಯಮಾ᳚ನಾಃ ।
ತತ್ ತೇ᳚ ಬಧ್ನಾ॒ಮ್ಯಾಯು॑ಷೇ॒ ವರ್ಚ॑ಸೇ॒ ಬಲಾ᳚ಯ ದೀರ್ಘಾಯು॒ತ್ವಾಯ॑ ಶ॒ತಶಾ᳚ರದಾಯ ॥೧॥
ನೈನಂ॒ ರಕ್ಷಾಂ᳚ಸಿ॒ ನ ಪಿ॑ಶಾ॒ಚಾಃ ಸ॑ಹನ್ತೇ ದೇ॒ವಾನಾ॒ಮೋಜಃ॑ ಪ್ರಥಮ॒ಜಂ ಹ್ಯೇ॒೩ತತ್।
ಯೋ ಬಿಭ॑ರ್ತಿ ದಾಕ್ಷಾಯ॒ಣಂ ಹಿರ᳚ಣ್ಯಂ॒ ಸ ಜೀ॒ವೇಷು॑ ಕೃಣುತೇ ದೀ॒ರ್ಘಮಾಯುಃ॑ ॥೨॥
ಅ॒ಪಾಂ ತೇಜೋ॒ ಜ್ಯೋತಿ॒ರೋಜೋ॒ ಬಲಂ᳚ ಚ॒ ವನ॒ಸ್ಪತೀ᳚ನಾಮು॒ತ ವೀ॒ರ್ಯಾ∫ಣಿ ।
ಇನ್ದ್ರ॑ ಇವೇನ್ದ್ರಿ॒ಯಾಣ್ಯಧಿ॑ ಧಾರಯಾಮೋ ಅ॒ಸ್ಮಿನ್ ತದ್ ದಕ್ಷ॑ಮಾಣೋ ಬಿಭರ॒ದ್ಧಿರ᳚ಣ್ಯಮ್॥೩॥
ಸಮಾ᳚ನಾಂ ಮಾ॒ಸಾಮೃ॒ತುಭಿ॑ಷ್ಟ್ವಾ ವ॒ಯಂ ಸಂ᳚ವತ್ಸ॒ರಸ್ಯ॒ ಪಯ॑ಸಾ ಪಿಪರ್ಮಿ ।
ಇ॒ನ್ದ್ರಾ॒ಗ್ನೀ ವಿಶ್ವೇ᳚ ದೇ॒ವಾಸ್ತೇಽನು॑ ಮನ್ಯನ್ತಾ॒ಮಹೃ॑ಣೀಯಮಾನಾಃ ॥೪॥

॥ ಇತಿ ಪ್ರಥಮ ಕಾಣ್ಡಃ ॥
॥ ಓಂ ಶಾನ್ತಿಃ ಶಾನ್ತಿಃ ಶಾನ್ತಿಃ ಓಂ ॥